Slåtten er i gang – kvaliteten er god!

NLR Vest dekker eit stort geografisk område frå Sunnhordland til Sunnmøre med store skilnader i klima og vekstforhold for grasdyrking. Denne veka har slåtten starta i dei tidlegaste bygdene medan bøndene i dei seinaste bygdene har avslutta gyllinga.

Høgenergifôr og 3 slåttar

Dei som har slått denne veka eller planlegg å slå no til helga satsar på å ta tre slåttar. Det har vore kaldt fram til det siste, så utviklinga i graset har hatt eit moderat tempo. Det betyr at energiinnhaldet i graset som er hausta denne veka har vore godt. Dette gjeld først og fremst Sunnhordland og Hardanger, men også på tidlege stader elles i Hordaland og lenger nordover, er slåtten i gang.

I skrivande stund, fredag 9. juni, er varmen endeleg komen til heile Vestlandet. Det er venta høge temperaturar i heile 10-dagarsperioden vi har framfor oss; heitast vert det i indre strok. Dette betyr at utviklinga i graset, og med det nedgang i både energi- og proteinmengde, skyt fart. Dette viser att på prognosane som er presentert i denne artikkelen.

Oppsummert:

• Graset som er hausta denne veka har hatt høg fôreiningskonsentrasjon (= supert mjølkefôr).
• Tidlege stader nord for Bergen:
  • Vil du ha høg fôreiningskonsentrasjon må det haustast no i helga/rett over helga.
  • Ynskjer du høgare avling og aksepterer ein energikvalitet under 0,90 FEm/kg ts kan du vente til ut i komande veke før du set i gang slåtten.
• Litt seinare stader:
  • Energirikt fôr får du i slutten av komande veke også.