Med eit nasjonalt mål om å auke den norskproduserte delen av fôret til husdyra, er det avgjerande å lykkast med grovfôrkvaliteten.
– For å få eit grovfôr med tilstrekkeleg høg energikonsentrasjon må bonden få presise råd om kva som er rett slåttetidspunkt for si eng, forklarar Mia Høiseth, rådgjevar i Norsk Landbruksrådgiving (NLR) Innlandet, og ein av prosjektarbeiderane i det nye prosjektet leia av NLR Innlandet.
Hurtigtesting av prognoseprøver for betre grovfôr
Presis rådgjeving er avgjerande
Planteutviklinga går raskt på forsommaren og det er difor naudsynt å gje gardbrukaren presise råd om kva slåttetid som er rett. Ei standard prognoseprøve, som NLR-rådgjevarane har teke ut i mange år, har ei forseinking på grunn av postgang til laboratoriet. Difor er gjerne svara frå desse prøvane litt for gamle når dei føreligg.
– Ved å gjere faktiske målingar med ei NIR-apparat i enga kan vi kanskje få eit verktøy som gjer oss i stand til å gi bonden heilt presise anbefalingar for slåttetidspunkt, seier rådgjevaren.
Denne sesongen skal apparatet testast og metodikken utviklast.
NIR-skanning
Erfaringsbygging og uttesting
Det skal samlast inn grasprøver frå 12 ulike gardar i Innlandet. Desse er plassert i nærleiken av ein meteorologisk målestasjon, som gjer det mogleg å hente ut vêrdata. Saman med prøver som sendast til standard analyse hos laboratorium, kan resultata frå NIR-skanninga verifiserast. Fysst når denne jobben er gjort med fleire prøver over fleire sesongar kan prosjektet konkludere.
– Når prøveperioden er over, vil vi vurdere om dette skal bli eit permanent tilbod for våre medlemmer, seier Høiseth.
Les også
