Både haust- og vårbrakking krev tilstrekkeleg vekst i plantane. Rotugras må ha nok bladmasse (4-5 blad, min. 10-20 cm høgde) eller stor nok rosett for å oppnå god verknad av brakkinga. Sprøyter ein for tidleg etter vekststarten, vil verknaden av sprøytinga bli betydeleg redusert og effekten blir dårleg. Hovudårsaka er at fotosyntesen og stoffomsetninga i ugraset ikkje er kome tilstrekkeleg i gang.
![Kveke brakking](https://www.nlr.no/media/news/vest/2021/_688xAUTO_fit_center-center_82_none_ns/kveke_brakking.png?c=20211201011743)
Kveke bør ha 4-5 blad- ver tolmodig!
I den fyrste vekstfasen om våren, fram til kveka har 2-3 blad, brukar kveka opplagsnæring frå underjordiske plantedelar. Sprøytinga i denne fasen har ikkje tilstrekkeleg verknad, sidan sprøytemiddelet ikkje blir transportert ned til røtene. Kveka er svakast på kompensasjonspunktet (4-5 blad) når næringsreservane i rota er på eit minimum. Fotosyntesen produserer ikkje meir energi enn det planten brukar til vekst. Sprøyter ein når kveka har 4-5 blad, blir preparatet frå bladverket frakta nedover i stengelen til stengelutlauparane og rotdelane, og heile planten døyr. Dette gjeld både sprøyting om våren, eller på gjenvekst etter slått.
![Komp kveke](https://www.nlr.no/media/news/vest/2021/_688xAUTO_fit_center-center_82_none_ns/komp_kveke.png?c=20211201011747)
Val av middel
Det er fleire glyfosatpreparat på marknaden. Normal dose for å ta kveke og anna gras er ca. 300-400 ml pr. dekar. Roundup Flex er meir konsentrert enn dei andle midla, difor trengs mindre prparat pr. dekar. Les etiketten!
Glyfosat i normal dose har ikkje fullgod verknad på ein del rotugras som f.eks. høymole, hundekjeks og krypsoleie. Ein kan då anten bruke dobbel dose (dvs. 600-700 ml pr. dekar), eller blande med eit sprøytemiddel mot dei problemugrasa ein har i enga. Les etiketten og hugs at blanding av fleire preparat inneber risiko for at verknaden av kvart enkelt middel ikkje blir like bra som om dei blir brukt kvar for seg.
![Hundekjeks brakking](https://www.nlr.no/media/news/vest/2021/_688xAUTO_fit_center-center_82_none_ns/hundekjeks_brakking.jpg?c=20211201011801)
Les meir om kveke her.